ⵉⵙⵜⵜⵎⴰ ⴷ ⴰⵢⵜⴰⵎⴰ ⵄⵣⵣⴰⵏⵉⵏ
ⵉⵙⵙⵓⵙⵎ ⴰⵖ, ⴽⵉⴳⴰⵏ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴰⴷ ⴷⴰⵖ ⵏⵎⴰⵏ ⴰⵙⵙⴰⴷ ⵙ ⵜⴼⵓⴳⵍⴰ ⵏ ⵓⴽⵜⵜⵓⵢ ⵏ ⵜⵉⵏⴰⵡⵜ ⵏ ⵓⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ, ⴰⴷ ⵜ ⵉⵃⴼⴹ ⵕⴱⴱⵉ, ⴳ ⵓⵊⴷⵉⵔ ⴰⵙⴳⴳⵯⴰⵙ ⵏ 2001, ⵍⵍⵉⴳ ⵉⵙⵔⵙ ⵜⵉⵔⵙⴰⵍ ⵏ ⵓⵙⵉⵏⴰⴳ.
ⵎⵔⵃⴱⴰ ⵉⵙⵙⵓⵏ ⵎⴰⵕⵕⴰ.
ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ, ⵙⵙⵍⴰⵎ ⵏ ⵕⴱⴱⵉ ⴼⵍⵍⴰⵡⵏ
ⵉⵙⵙⵓⵙⵎ ⴰⵖ ⴳ ⵓⵙⵉⵏⴰⴳ ⴰⴳⵍⴷⴰⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⴷ ⵏⵕⵥⵎ ⵜⴰⵡⴰⵍⴰ ⵜⵉⵙ 23 ⵏ ⵓⵙⴽⵜⵉ ⵏ ⵉⵏⴰⵡ ⴰⴳⵍⴷⴰⵏ ⵢⴰⵜⵜⵓⵢⵏ ⵏ ⵓⵊⴷⵉⵔ, ⵏⵏⴰ ⴳ ⵉⵙⵔⵙ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ, ⴰⴷ ⴰⵙ ⵉⴼⵔⴳ ⵕⴱⴱⵉ, ⵙ ⵓⵣⵎⵣⵣⵓ ⵏⵏⵙ, ⵟⵟⴰⴱⵄ ⵏⵏⵙ ⴰⵛⵔⵉⴼ ⵅⴼ ⵓⴹⴰⵀⵉⵕ ⵉⵙⵏⴼⵍⵏ, ⵉⵙⵏⵎⴰⵍⴰⵏ ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴰⵙⵙ ⵏ 17 ⴽⵟⵓⴱⵕ ⵏ ⵓⵙⴳⴳⵯⴰⵙ ⵏ 2001 ⴳ ⵓⵊⴷⵉⵔ, ⴳ ⵜⵙⴳⴰ ⵏ ⵅⵏⵉⴼⵕⴰ. ⵉⵙⴱⵓⵔⵣ ⴰⵖ ⴰⴷ ⵏⵙⵜⵉ ⵉ ⵜⵡⴰⵍⴰ ⴰⴷ ⵜⴰⵎⴰⵜⴰⵔⵜ : « ⴰⵙⴷⵓⵙ ⵏ ⵉⵣⴰⵍⵉⵡⵏ ⵉⴷⵍⵙⴰⵏⵏ ⴷ ⵉⵎⵙⵓⵔⴰⵙ ⵏ ⵓⵎⵢⴰⵎⴰⵥ ⴰⵡⴰⵛⵓⵏ », ⵉⵎⵓⵏⵏ ⴷ ⵜⴰⵏⵏⴰⵢⵜ ⵜⴰⴳⵍⴷⴰⵏⵜ ⵏ 2024, ⵏⵏⴰ ⵉⵙⵜⵉⵏ ⵉⵣⴰⵍⵉⵡⵏ ⵉⵡⴰⵛⵓⵏⵏ ⴰⴷ ⵉⵍⵉⵏ ⴰⵎⵎⴰⵙ ⵏ ⵉⵎⵓⵙⵙⵓⵜⵏ ⵉⴷⵍⵙⴰⵏⵏ ⴷ ⵉⵏⴳⵎⴰⵏⵏ ⵉⵏⴰⵎⵓⵔⵏ.
ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ,
ⵏⴱⵓⵔⵣ ⵢⵉⵍⵉ ⴰⵖ ⵓⵎⴷⴰⵣ ⵇⵇⴰⵃ ⵏⵏⵖ, ⴰⵛⴽⵓ ⵜⵏⵏⵓⵍⴰ ⵜⵡⴰⵍⴰ ⴰⴷ ⵏ ⵓⵙⴳⴳⵯⴰⵙ ⵏ 2024, ⴰⵙⴽⵜⵉ ⴰⴽⵙⵡⴰⵜ ⵏ ⵉⵖⵉⵎⵉ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⵅⴼ ⵓⴷⴰⴱⵓ ⵏ ⵉⵎⵣⵡⵓⵔⴰ ⵏⵏⵙ ⵉⵖⵓⴷⴰⵏ.
ⴽⵉⴳⴰⵏ ⵏ ⵜⵡⵓⵔⵉⵡⵉⵏ ⵉⵍⴰⵏ ⴰⵜⵉⴳ ⵎⵇⵇⵓⵔⵏ ⴰⵢⴷ ⵉⵜⵜⵓⴳⴰⵏ ⴳ ⵜⵙⵓⵜⴰ ⵜⴰⵎⴰⵢⵏⵓⵜ, ⴳ ⵡⴰⵟⵟⴰⵚ ⵏ ⵉⴳⵔⴰⵏ, ⴰⵎ ⵉⴳⵔ ⴰⴷⵙⵜⴰⵔ ⴷ ⵓⵣⵔⴼⴰⵏ ⴷ ⵓⴷⵎⵙⴰⵏ ⴷ ⵓⴷⵍⵙⴰⵏ. ⴷ ⵢⵉⴳⵔ ⴰⴷⵍⵙⴰⵏ ⵏⵏⵉⴽ ⴰ ⵅⴼ ⵉⵙⴰⵡⵍ ⴱⴰⴱ ⵏ ⵡⴰⴷⴷⵓⵔ ⴰⴷ ⴰⵙ ⵉⴼⵔⴳ ⵕⴱⴱⵉ, ⴳ ⵉⵏⴰⵡ ⵏⵏⵙ ⵏ ⵓⵊⴷⵉⵔ ⵙ ⵜⴳⴳⴰⵣⵜ ⵏⵏⵙ ⵢⴰⵜⵜⵓⵢⵏ. ⵉⴷⴷⵖ ⵉⵙⵏⴼⵍ ⵢⴰⵜ ⵜⴰⵏⵏⴰⵢⵜ ⵜⴰⵎⴰⵢⵏⵓⵜ ⵏ ⵜⵓⵙⵙⵏⴰ ⵜⴰⵎⵖⵔⴰⴱⵉⵢⵜ, ⵉⵙⵔⵙ ⵜⵉⵔⵙⴰⵍ ⵜⵉⵎⵣⵡⵓⵔⴰ ⵏ ⵜⴳⵔⴰⵡⵍⴰ ⵜⴰⴷⵍⵙⴰⵏⵜ ⵜⵓⵎⵍⵉⵍⵜ, ⵉⴱⴷⴷⴰⵏ ⵅⴼ ⵜⴰⵎⵓⵏⵜ ⴳ ⵓⵎⵢⴰⵏⴰⵡ ⴰⴷⵍⵙⴰⵏ ⴷ ⵓⵙⵏⵉⵍⵙ. ⵉⵔⵏⵓ ⵉⴳ ⵜⴰⵎⴰⵣⵉⵖⵜ, ⵜⵓⵜⵍⴰⵢⵜ ⴷ ⵜⵓⵙⵙⵏⴰ ⴷ ⵜⵎⴰⴳⵉⵜ, ⴳ ⵡⵓⵍ ⵏ ⵜⴰⵏⵏⴰⵢⵜ ⴰⴷ. ⵜⵏⵏⴰ ⴰⴷ ⵉⴳⴰⵏ ⴰⵙⵙⵏⵜⵉ ⵏ ⵜⵙⵓⵜⴰ ⵜⴰⵎⴰⵢⵏⵓⵜ ⵏ ⵜⵎⴰⵣⵉⵖⵜ ⵙ ⵓⵙⵏⴼⵍ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ. ⴷⴼⴼⵉⵔ ⵓⵢⴰⴷ, ⵜⵓⵛⴽⴰ ⴷ ⵜⵡⴰⵍⴰ ⵏ ⵓⴷⵓⵙⵜⵓⵔ ⴰⵎⴰⵢⵏⵓ ⵏ ⵓⵙⴳⴳⵯⴰⵙ ⵏ 2011, ⵏⵏⴰ ⵉⵚⵏⵚⴱⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵉⴷⵉⵙ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ. ⵏⴽⵯⵏⵉ, ⴰⵙⵙ ⴰⴷ ⴳ ⵜⵡⴰⵍⴰ ⵢⴰⴹⵏ ⵏ ⵜⵡⴰⴷⴰ ⵜⴰⵎⵣⵔⴰⵢⵜ ⵏ ⵜⵎⴰⵣⵉⵖⵜ, ⵙ ⵓⵙⵙⵏⵜⵉ ⵏ ⵓⵙⵎⵔⵙⵍ ⵏⵏⵙ ⴳ ⵉⴳⵔⴰⵏ ⵉⵎⵣⵡⵓⵔⴰ, ⴳ ⵓⵙⴰⵜⵉ ⵏ ⵓⵣⵓⴳⴳⵣ ⵏ ⵓⵙⵍⴳⵏ ⴰⵎⴰⴷⴷⴰⵙ 26-16, ⵉⵣⴷⵉⵏ ⴷ ⵓⵣⵓⴳⴳⵣ ⵏ ⵡⴰⴷⴷⴰⴷ ⵓⵏⵚⵉⴱ ⵏ ⵜⵎⴰⵣⵉⵖⵜ.
ⵇⵇⴰⵃⵏⵏⵖ ⵏⵉⵡⴹ ⵙ ⵜⵎⴰⵟⵟⴰⴼⵉⵏ ⵖⵓⵔ ⴰⵜⵉⴳ ⴰⴽⵙⵡⴰⵜ ⵉ ⵜⵎⴰⵣⵉⵖⵜ ⴳ ⵡⴰⵟⵟⴰⵚ ⵏ ⵉⴳⵔⴰⵏ : ⴰⵙⴳⵎⵉ, ⴰⵙⵍⵎⴷ, ⵜⴰⵖⵎⵙⴰ ⴷ ⵜⵓⵙⵙⵏⴰ. ⵎⴰⴽⴰ, ⵏⵓⴽⵣ ⵉⵙ ⵉⵙⵓⵍ ⵎⴰⵢⴷ ⵉⵜⵜⵓⴳⴰⵏ ⵙ ⵜⵡⵉⵙⵉ ⵜⴰⵎⵔⵙⴰⵍⵜ ⴷ ⵓⵙⴳⵓⵜ ⵏ ⵉⵙⵓⴳⵉⵎ ⵉⵏⴼⴳⴰⵏⵏ ⴷ ⵓⴹⴼⵓⵕ ⵉⴼⴰⴼⴰⵏ ⵏ ⵡⴰⵎⵓⵏ ⴷ ⵡⵓⵎⵓ ⵏ ⵇⵇⴰⵃⵏⵏⵖ. ⵎⴰⴽⴰ ⵏⵙⵓⵍ ⴰⴷ ⵏⴰⵎⵥ ⵙ ⵓⵖⴰⵔⴰⵙ ⴰⵏⴰⵎⵓⵔ ⴰⵖⵔⵎⴰⵏ ⴳ ⵜⵡⵓⵔⵉ ⵏⵏⵖ ⵏ ⵓⵙⵅⵉⵜⵔ ⴷ ⵓⵙⴱⵓⵔⵣ ⵏ ⵜⵎⴰⵣⵉⵖⵜ ⵙ ⵓⵎⴰⵜⴰ ⴰⴷ ⵜⴰⵡⴹ ⴰⵏⵙⴰ ⵉⵖⵓⴷⴰⵏ.
ⴰⴷ ⴰⵖ ⵉⵙⵎⵓⵔⵙ ⵇⵇⴰⵃⵏⵏⵖ ⵕⴱⴱⵉ ⴷ ⵓⵢⵏⵏⴰ ⵉⴼⵓⵍⴽⵉⵏ ⵉ ⵜⵎⵓⵔⵜ ⴷ ⵓⴳⴷⵓⴷ ⵏⵏⵖ.
ⴰⵣⵓⵍ ⴼⵍⵍⴰⵡⵏ.
ⵃⵎⴰⴷ ⴱⵓⴽⴽⵓⵙ
